ذكريات شتوية + تور سياحي وشوية مشتريات

By Mixnmaatch - 6:37 AM

مرحبا كيفكم

بوست اليوم جو جديد عالمدونه وعلي

فيه شي مني، اجواء عشتها ابغاكم تشاركوني هيا ، تور سياحي ، وبالاضافه باخر البوست الفقره اللي تحبوها
(فقره مشتريات)

كثير تجيني طلعات للمنطقة الشرقية بحكم سكن اختي هناك لدرجة سارت بيتي الثاني ❤️❤️
وعلى كثر الطلعات الا ان طلعاتي بفصل الشتاء غير بالنسبه لي ، الايام هاذي كانت سبشل ولايمكن انساها ، لايمكن انسى الطلعات والجمعات والناس اللي تعرفت عليهم هناك ،لايمكن انسى البحرين والستي سينتر والسنو مان واجواء الشتاء والنييويير والكريسمس اللي كانت ماليه الستي سينتر ( اتكلم عن الجو العام فقط اجواء الاعياد والاحتفلات تستهويني واحبها تخليني احس بالسعاده الموضوع ماله علاقة بمعتقدات دينينه علشان محد ينتقد ).
ولايمكن انسى بردهم اللي يعور في العظام خاصة بالنسبة لشخص عايش طول عمره بجدة والله اني لما افتكر تجيني نفظة ههههههه .. رغم كذا لاكني من محبين الشتاء واجواء الشتاء وبرد الشتاء حتى وانا ابرد من نسمة الهوا، لاكن تبغوني احب مكان ودوني له في شتا واجواء حلوة ..

حقيقي من زمان وانا ودي انزل موضوع عن وين اروح بالشرقية والبحرين وايش البوتيكات المميزه اللي ممكن الواحد يروحها بحكم زياراتي المتعدده وخبرتي البسيطه بالاماكن هناك خاصة ان دايم صحباتي يسؤلوني نفس هذا السؤال لما تجيهم سفره لهناك وكنت ادلهم باللي متعوده اروحله ويكونو مبسوطين من اختياراتي وهالشي اكثر شي حمسني لهالبوست على الرغم من تخوفي من الاصداء حول هالاختلاف وهل حيجذبكم وتحبو البوست ام لا

فردودكم تحت ورأيكم هو اللي حيحكم اذ حتحمس ويكون فيه بوستات بالمستقبل لها نفس الجو او لا !!!

البوست هذا كان مقرر انه ينزل تقريبا قبل ٣ شهور اول مارجعت من اخر زيارة لي ( لو تفتكرو بالسناب كنت مجهزه للبوست وصورت المشتريات ) لاكن للاسف ماقدرت انزله بالوقت اللي كنت محددته لان احداث كثير لها علاقة بالفاشن سارت بالفتره اللي راحت ، كنت حريصة اغطيها لكم وكانت ماخذة وقتي وطاقتي فمالقيت وقت الا الان

وامكن خيرة من ربي البوست يتأجل لهالوقت علشان كلامي يكون من القلب ويوصلكم ❤️❤️❤️

Where i should go

** طلعاتي بالعموم عبارة عن اسواق ومطاعم فماعندي اي فكره عن منتزهات او شاليهات او فنادق او اي شي من هالقبيل فهنا الدور عليكم انتم اذ في احد من اهل الشرقية واهل البحرين يتابعني او قرأ البوست يقولنا عن اماكن حلوة غير اللي بذكرها احطها في اللسته لطلعاتي الجايه وغيري يستفيد

بالنسبة للشرقية ..

اشهر الاسواق هناك

١- الظهران مول (تابع للمراكز العربيه)

٢- الراشد مول

فيه من محلات الظهران مول و بعض الماركات العالمية بالاضافة لبوتيكات فيها قطع مميزه علشان كذا احب اروحله اكثر من الظهران مول ، احب اجلس تحت في قيصرية الراشد (منطقة تراثيه فيها كفيات ومحلات بطابع تراثي ) يعني جو مختلف عن اجواء جده ، كمان فيها محلات عبايات وجلابيات والمحل الجميل Handsome Gift

اما المطاعم والكفيات !!!!

١- مادلين Madelein
ماعتبر رحت الشرقية اذ مارحت لمادلين من افضل المطاعم والكافيات بالنسبه لي ماذكر قيد اكلت شي عندهم مو لذيذ من فطور لغدا لعشا واما بالنسبه للحلى عندهم فهو شي ثاني❤️❤️

٢- سيركل Circle
من المطاعم اللي تحسي انك في بيتك Feel like home .. يعني ان كنتي طالعه مع اخواتك صحباتك بنات خالاتك انصحك فيه جدا اجوائه حلوه لجمعه بنات

٣- بيز Baize
مطعم اكله تراثي خيار جيد للفطور وللاكل لو كنتي من محببين الاكلات الخليجيه .. عن نفسي هالنوع من المطاعم احب اروحله فطور او قهوة فقط

٤- Rosette , Pastel , La touche
كلها كافيهات المنيو حقها محدود ، اجوائهم وحده اذ تحبي الهدوء والرواقة انصحك فيهم
وكلهم يشتركو بشي واحد وسار ادماني وللاسف مافيه عندنا بجده كافيه يقدمه واللي هو الروز كوفي ( قهوة بنكهة الورد )
جربو اطلبوها في روزيت مع كيكة الفستق وباستيل مع البودينق تمر بالكراميل

٥- بيسترو Bistro
واحد من المطاعم الجديده اللي فتحت مؤخراً ، حبيت اللوتس سبيشل عندهم مره شي يمي

٦- سوشل نيتوورك Social Network Cafe
احب اجوائه في الصبح هادي ومناسب لفطور ، فطوره انترناشونال .. اجبان ساندوش بانكيك وافل

٧- جزيره الدغيثر في كورنيش الخبر فيها كم مطعم عالبحر منهم ايولي لاونج Aioli Lounge، لاقونا ايسترن Laguna Eastern , براسا Brasa de brazl ... المطعم الوحيد اللي جربته وزعلت انه قفل Don Corleone جلساته الخارجيه كانت بطله رحتله بيوم مطر لا احكيلكم كيف كانت القعده ❤️

٨- Ranch Burger
للامانه ماجربته بس من مطاعم البرجر المشهوره بالشرقية وعلى كلام اهل الشرقية انه ينافس شيك شاك وكثير ينصحو فيه

** من الاشياء اللي لاحظتها وخلاني اكون فخوره جدا ان اغلب الكفيات اللي سبق وذكرتها بزنس محلي اصحابها نساء جودتها حقيقي ابدا ماتفرق عن المطاعم العالميه سواء بالاكل او بالديكور والمكان

كمان من الاماكن المشهورة بالخبر

شارع البيبسي اغلبه مطاعم وكفيهات ومحلات حلويات وتشوكليت منها

( Bostani ، Joy ، Blessing Pink Box ، Anoosh ، تمرية ...... )

وحبيب الشعب دايسو موجود في دارين مول الدمام ، ومجمع امواج بالخبر

فرض واجب الروحة له ههههه

------------------------------

بالنسبة للبحرين ..

طبعا ماتحلى الروحة للشرقية من غير مانسير عالبحرين ❤️
حدي فيها السيف مول وماجاورها ، الستي سنتر
ماقيد طولت اكثر من ويك اند علشان اكتشف اماكن ثانيه وبعض الاحيان اخذها زيارة وارجع بنفس اليوم

جربت وسكنت مره في الستي سنتر ومره بالسيف مول ،،
بالنسبة لي كاجواء اجواء الستي سنتر احلى بكثير جدا منعشة للسكن وللشوبينق وللسينيما ماينمل من اجوائه ..
لاكن مطاعم وكفيات مافي خيارات كثير جديده STARBUCKS ،COSTA ،iHOP ، P.F. CHANG'S ، Kosebasi , Paul ومطاعم فاست فود ..
وانا احب لما اروح مكان جديد اجرب مطاعم ومحلات جديده ماتكون عندنا ..

علشان كذا اخر مره سكنت بالسيف مول لان المنطقة اللي حوله والمطاعم اللي هناك بالاضافه للعالي مول جدا تغري كفاية وجود الحب ليلو Cafe Lilou
ما امل منه صبح ظهر مسا .. تبغو تشوفون نشوة الاستمتاع شوفوني وانا اكل في ليلو ما ابالغ شي جدا لذيذ اصلن سمعته سابقته مو مستنين شهادتي من اشهر المطاعم في البحرين ودايم زحمة عندهم فرع بالعالي مول وفرع بمنطقة العدلية

بالنسبه للعالي مول قريب من السيف تقدري تروحيله مشي لو كنتي ساكنة في السيف مول ، السوق جدا صغير يخلص بيوم مو زي السيف والستي سينتر
فيه بوتيكات ملابس وفساتين اذ كنتي تدوري على قطع مميزه
( ABS , Hazelnut , Noof , Mimo space , Mimosa , Pink , Seventh heaven )
وبعض الماركات العالمية
(Coach , Jimmy choo ، Jucy couture , Moschino)
ومحل ديكور اسمه The One (عذاااااب) ..
بالاضافه الى منطقة اسمها سوق الطواويش .. منطقة تراثية عباره عن سيب عاليمين واليسار كم محل ومطعم .. انا اروحلها علشان الجلسة فيها مره حلوة خاصة بالنهار سواء بـ Al Bindaira Cafe او Lumee Street Cafe

** بس اللي لاحظته في البوتيكات من اخر زيارة لي ان مافي تجديد في البضاعه الموجودة يعني اللي دايم يتردد عليهم ماحيلاقي شي جديد اشياء شفتها من سنه رجعت شفتها باخر زياره لي ، بس لو انتي سفرتك الاولى للبحرين ممكن بالنسبه لك تكون القطع جديده وتشوفي قطعهم مميزه عن نفسي ماطلعت الا بكلتش

**بالنسبة لاسعار الماركات العالمية ماشفت فيها فرق عننا نفسها بس ممكن البضاعه توصلهم اول قبل لاتوصلنا بالسعودية ..
شفت مره شنطة بكوتش كانت عاجبتني فما اسعفني الوقت اني ارجعلها قلت اكيد الاقيها عندنا ولما رجعنا الشرقية اليوم الثاني رحت فرع الظهران مول ومالقيتها .. وخلاص ماعاد دورتها بعد كذا وبالصدفة بعد شهر تقريبا من رجعتي لجده رحت ستارز افنيو ودخلت كوتش ولقيتها وكانو منزلين لونين منها فقط والاهم اللون اللي عجبني ماكان موجود ..

كمان من الاماكن المشهورة بالبحرين

مطعم Villa Mamas

من اشهر المطاعم البحرينيه اللي عليها اقبال كثير كل مين يزور البحرين لازم يزور هالمطعم .. للان ماجربته حاطته من ضمن لستتي للزيارة الجايه

نجي لاخر بارت بالبوست ..My Haul ..

Pink Total Flirt

مجموعة شاور من Victoria Secret الستي سينتر

من اليمين سيبراي جسم ، لوشن جسم ، شاور جل ومقشر ٢ في ١

ترطيب اللوشن عادي والتقشير جدا بسيط ينفع تستخدميه بشكل يومي اما بالنسبه للرائحة جدا خفيفة وماهي نفاثة

(وعلى فكره فاتح بينك وفيكتورويا سيكرت ملابس مو بس عطور وكريمات )

مقهوره اني سايزي كان مخلص من كذا ترينك عجبوني

وطلعت فقط ببانتيز وهالمجموعة

سيبراي للجسم من h&m روائحهم جميله وثباتها بالنسبة لي افضل من مجموعة بينك اللي قبل

مشتريات الميك اب كلها من سيفورا الستي سينتر

نبدأ برايمر العين من بينيفت Stay
سمعت مدح كثير عليه انه يوحد الجفن ويبرز الشادوهات الخفيفه واللي تشتغل بالمحل قالتلي انو ممكن يستخدم ككونسيلر
بس للان ماجربته مخليته لمكياج السهرات واللي احتاج فيها ان الشادو يكون وضح

اما بالنسبه للشي الثاني فهو ماسكارا من سيفورا اسمها Ultra Black
اخذتها على اساس ابغى شي يومي يعطي كثافه للرموش من غير تطويل
عجبني الفينيشينق اللي اعطتني هوا مناسب للوك بسيط يومي
بس عيبها انها سايله وتحوس الدنيا يعني يبغالها حذر وانتي تحطيها
وهالشي مخليني اتكاسل في اني استخدمها

X Formula و Essie

دائما خياري الاول في المناكير جودتهم ممتازه واللون واضح ودرجات الالوان تتعبي وانتي تختاري

هذا اكثر لون وقعت في غرامه من بين اللي اخذتهم ، ترا درجته على باستيل بس في السواتش باين اغمق

اما بالنسبه للونين الثانيه
مو كثير حبيت درجاتهم على يدي سمرتها بزيادة
احس حيكونو احلى على البشرات الفاتحه

ياقة منفصلة ممكن تتلبس تحت بلوفر او فستان مرره حبيت فكرتها واحسها تضيف للقطعه اللي حتتلبس معاها

اخذتها من ريفر ايلاند الستي سينتر

اذ تبغو بوست تنسيقات لها (How to wear it ) اكتبولي تحت

نظارة النظر من اكثر الاشياء اللي اتعب في اختيارها

اغلب النظارات حجمها مايناسب وجهي ودائما تكون كبيره فالاقي صعوبه في الاختيار

بالاضافه ان الخيارات بجدة بالنسبة لمحلات النظارات جدا محدوده وحقيقي الاشكال والماركات اللي يجيبوها

مافيها تنويع نفس التنويع اللي لقيته في البحرين واللي يخليكي تحتاري

سواء من عدد المحلات اللي في السوق الواحد او من ناحية البراندز او التشكيلة الموجودة في كل محل

بلوزه بستايل البوهو اخذتها من زارا والسلاسل من مانقو ( عندهم محل منفصل خاص بالشنط والجزم والاكسسواريز جميل لاتفوتوه )

كلهم من السيف مول

فاكرين حيرتي والاستشارات بالسناب قعدت ساعه بالمحل مني قادره اختار بينهم ، رجعت الفندق وطول اليوم
وانا مره الاصفر ومره الفوشي ومره المسدس
وازيدكم من الشعر بيت لما رجعتله اخر يوم وانا مقرره خلاص،
كانت فيه الوان ثانيه جديده زادتني حيره كمان وكمان (:

بس خلاص استقريت على هذي حسيت الغرابه اللي فيها مو مألوفه وتمثل ستايلي اكثر من الباقي
غير انها ممكن تتلبس هالجهتين
اخذتها من بوتيك pink بالعالي مول جنب Cafe Lilou