مرحبا

 شفنا تصاميم والوان كثيره لهالقطعه وباسعار متفاوته فيه الرخيص وفيه الغالي، ومحلات كثير وبوتيكات ومصممات مجوهرات
 ابدعو في تصميم وتوفير هالترند لنا

لاكن بهالبوست ماحتكلم عن فين ممكن تلاقي هالترند لان سبق وذكرت هنا  

اليوم
 حابه اوريكم كيف ممكن تصنعي شوكر بلمساتك والوانك

من تصاميم الشوكر اللي انا شخصيا حبيتها اكثر من اي تصميم ثاني هو الـ
Monarch Bandana Choker

ستايل سبور مع لمسات من الكرستال تعطي رونق لطلتك

لما كنت انسق للعيد خطر في بالي هالشوكر وحسيت حيكون حلو على فستان عندي لونه ابيض V neck
لاكن طبعا هالكلام كان باخر رمضان فلضيق الوقت ماكان حيوصلني قبل العيد لو طلبته اون لاين  فقررت اني اسويه بنفسي

وعلشان ستايل الفستان والطلة كان حيكون كلاسيك فقررت استبدل البندانه بشماغ

وهذا كل اللي راح تحتاجيه علشان تسوي الـ Monarch Bandana Choker 

١-شماغ قديمة  

٢- اكسسوار (ممكن يكون عقد قديم او اسوره او ممكن كلفه كرستال تلاقيها بمحلات الكلف باشكال 

٣- مقص 

٤-مكينة خياطة
( راح تحتاجيها في تثبيت الاطراف فقط علشان يكون الشغل مرتب فاذا ماعندك اي خلفية عن الخياطه وماتعرفي احد في هالمجال ممكن يساعدك
 تقدري تستبدلي المكينه بغراء مخصوص للاقمشة او غراء مسدس )

٥- غرا مسدس

اول خطوه راح تاخذي مقاسات الشوكر اللي انتي تبغيها ويكون متناسب مع محيط وارتفاع رقبتك

بعد كذا راح تقصي الشماغ
لاكن لازم تحطي في بالك هالاشياء قبل ماتقصي 

* اذ كنتي حتستخدمي قماش ناعم مثل الشماغ  فالافضل الشوكر يكون على طبقتين او ٣ 

* اذ كنتي حابه يكون الشوكر جامد صلب ممكن تبطنيه بفازلين  لاكن انا فضلته يكون ناعم علشان يكون مرن في الحركة

بعد كذا راح تخيطي الاطراف  

وعلشان ماحبيت يعملي زحمة لما اربطه فخليت النهايه عباره عن حبل نحيف ناعم من نفس الشماغ زي ماهو باين في الصور

الخيارات كثير ممكن تخليه بنفس العرض او تستخدمي شريط اسود او شريط جلد نحيف او ممكن تخلي تقفيلة الشوكر بـ ازرار او طقطق (Press Stud)
 الخيار راجع لكم

واخر خطوه ثبتي الاكسسوار الكرستال بغرا مسدس

وبس الفكره جدا سهله تقدرو تطبقوها بشماغ او بندانه او اي قطعة قماش عندكم او حتى كلفة زي مانتو تحبو